اشلون تنباق وانت تضحك في السفر

السلام عليكم ورحمة الله وبركاته

كل عام وانتم بالف خير طبعا احنا الحين على ابواب الإختبارات النهائية او الفاينل كلها كم يوم وتجينا العطله الصيفية

وكعادتها الطيور المهاجرة ما تحب تقعد بالديرة اول ما تحصل لها فرصه تهج للخارج للسياحة او للعلاج او للهروب من الحر

يعني نقدر نقول تعددت الأسباب والسفر واحد المهم مو ضوعي مو عن السفر نفسة ولكن ما يحصل اثناء السفر طبعا

في اشياء كثيره تحصل منها الغاء الحجوزات وضياع الأمتعه وهروب الخدم والتعرض للسرقه وهذا الموضوع الذي سوف

اركز علييه الا وهو السرقه اثناء السفر

راح تسألوني اشلون اول جواب راح يكون بسبب الاهمال او عدم التركيز او الثقه الزائده عن الحد ترى مو كل الناس ملائكة ولا كلهم

شياطين لكن بما انه الشخص اللي امامك ما تعرفه فلازم تاخذ حذرك منه او من اي حركات غريبه تبدر منه طبعا اول شي

راح اشرح هذي المواقف بعدين راح استوضحها بالفيديو وثل ما قالوا الصوره اكبر دليل وراح يتبين لكم الطرق والأساليب

المختلفة اللي يقومون فيها بالسرقه منكم وانتم ماتدرون ويا غافلين لكم الله

اول موقف وانت واقف في المطار ناطر اهلك او ربعك وقاعد تنهي الإجراءات الروتينية والمعتاده على اي مسافر اييك واحد

ويدزك من كتفك ويقول لك بعباره لطيفه لو سمح شوي يعني وخر ابي اطوف طبعا شي عادي مع زحمه المطارات

مجرد انه استاذتك بالمرور لكن الغير عادي انه كان حاط بإيده طباشير وعلم على ثيابك بالطباشير الجهه اللي فيها

بوكك(محفظه نقودك ) المهم انت ما حسيت بشي يقوم ايي واحد ثاني متفق مع الاول ويجهز كومه قصاصات من الورق على شكله محفظه ويقوم بسحب المحفظة ووضع القصاصات مكانها طبعا انت لما حسيت بدفعه لك حطيت ايدك على جيبك وكل شي تمام

لكم لما تروح للكوفي شوب او اي محل وتبدا بدف الحساب راح تكتشف بأن البوك طار ومكانه قصاصات من الورق


.

اما الموقف الثاني فإنك تكون مشغل البلوتوث بجهازك وقاعد تتمشى بالمطار او في اي مكان عام والوضع تمام وما تدري انه البلوتوث هو عبارة عن موجات لاسلكية تصدر من جهازك عبر دائره نصف قطرها 100 متر يعني تقريبا تغطي جزء كبير من مساحة المطار اذا مو المطار بأكمله في هذة اللحظه هناك واحد شغال بعمل بحث او سكان للأجهزة الاتي شغاله بها البلوتوث وعبر برنامج بسيط يقوم بشبك جهازه على جهازك وذلك من غير علمك ويبدأ بعمل المكالمات من موبايلك وهو بداخل جيبك ومن غير ما تحس ولما تجي تبي تتصل تفاجاء بان رصيدك
صفر كيف حصل هالشي ما عندك اي تفسير له فأنصحكم انكم تطفون البلوتوث اثناء سفركم

اما الموقف الثالث فتكون عازم صديقك او العائله المحترمه على الكوفي شوب وقاعدين تطلبون الطلبات العادية والحين خلصتوا بالعافية وجت ساعه الدفع وهنا قام الويتر بإحضار ماكينه الدفع لانه حضرتك تبي تدفع بالفيزا تقوم انت وتعطيه الفيزا يقوم اهوا بهذي اللحظه بإيقاع الفيزا على الارض وأثناء التقاطها يقوم بسحبها بجهاز معد خصيصا لسرقه بيانات الفيزا ومثبت على رجلة فوق الجوتي تكرمون

وبعد ما يسحبها بالمشين يعطيك اياها ويشكرك على الزياره وكل شي تمام المهم بعد ما تروح يقوم بتنزيل البيانات مالت الفيزا اللي اخذها منك بواسطه الكمبيوتر وتحميلها على كرت فيزا وهمي ويقوم بإستعمالها وانت ولا بالبال ولما ترجع الديرة تفاجأ بان عليك الوف مؤلفه وبأنك شاري نص ديرتهم اشلون الله اعلم والصحيح انك ما شريت شي ولكن اهوا من قام بهذة العمليات على ظهرك

وساعتها ما ينفع الندم وراح تدفع قيمتها فلس فلس وانت تضحك

المهم هذا كل ما عندي لليوم وانشاء الله نكمل البقيه في الأجزاء القادمه والسلام عليكم ورحمة الله