االمطعم اللبناني- مانويلا

طبعا بما اني تكلمت على السولدير اجد نفسي مجبرا ان اتكلم عن الأكلات اللبنانية لما يمتاز به المطبخ اللبناني

عن باقي المطابخ من نكهات طبعا كما تعرون اكثر ما يميز المطاعم اللبنانية هوالمقبلات وعلى رأس القائمة

التبوله هذه الأكله الشهيره التي تمتاز بالطعم الرائع ويأتي بعدها الفتوش والحمص وورق العنب وووالخ

طبعا طريقه المطعم اللبناني يبدأ بالمكسرات ثم المقبلات بجميع انواعها واللي عددناها في الاسطر فوق

ثم بعد ذلك الطبق الرئيسي فلازم الواحد ما يكثر من المقبلات وهذا شي صعب لانه كل شي لذيذ

ويصبر روحه او يخلي مكان للطبق الرئيسي وهو في العاده المشويات

المهم بصراحة في مطعم الواحد اذا ماراح له ما كأنه راح بيروت اسم المطعم مانويلا وهو يكون

بصفة المطاعم في جونيا في المعاملتين طبعا الكل يتساءل شنو السر بهل المطعم وأقول

لكم لقد سألتو عن عظيم نظام المطعم هذا انه ما عنده غير طلبين يا سمك يا لحم

فأول ما تقعد تقول له مثلا لحم وتحدد عدد الاشخاص وانصحكم قسموا عددكم على اثنين

يعني اذا كنتوا 6 طلبوا حق ثلاثة اقول لكم ليش

اول ما يبلش اييب لكم بيذان بالثلج حق التطقطق وبعدها اييب سله الخضره بلا مبالغه

تكفي خمسه من حيث الكمية وكل شي فرش وعلى كيف كيفك

المهم بعدها يبدا بالزيتون والمخللات طبعا انا الغيه لآني ما اواطن المخلل

المهم بعدها يبدا الجد طبعا هالشي يصير خلال خمس دقائق يعني شغالين السرفس

خدمة خمس نجوم ما يمديك ترفع ايدك الا اهوا يمك مو مثل اللي عندنا تموت لحد ما اييك واحد

ما عليينا ما ابي اشط عن الموضوع نرد لمحور حديثنا اي نعم وصلنا عند المقبلات

هني يبدون اييبون الحمص والتبوله والفتوش وورق العنب والكبة العادية والكبة النيه والبليله

وارضي شوكي والبطاطا العادية والبطاطا فرنش فرايز والمتبل ووووو لين تنترس الطاوله

طبعا اذا كنتوا اثنين راح تشوف الاكل الموجود يكفي 6 اشخاص بلا مبالغة

تاكل لين يطيح ميخك بعدها يشرف حضرته المين كورس او الطبق الرئيسي

أنت اول ما تشوفه تحس انهم يبون يعذبونك مع انه بطنك شبه متروس

تشوف هالمشويات يالله من فضلك الكباب والشقف والعرايس والريش

شكلهم يشهي والريحه همن تفتح الشهية اكثر فتبدا تضرب بالخمس

بعد ها بخمس دقايق خلالاص تسنح وتشوف اللي يمك صار اثنين

فجأه اييك واحد يقولك لو سمحت لعدم كفاية المكان على الطاولة

تسمح تنتقل على الطاول اللي خلفك تشوف وراك طاوله كامله

متروسه بكل ما لذ وطاب من الحلويات والفاكهه كرز مشمش رقي ووو

والحلويات العربية اوكي طبعا انت مافي بطنك ولا مجال بس تقول حرام

خل اتذوق على الأقل من كل شي وحده تقول خلصنا لا

بعد ما تخلص اييبون لك قشطة بلدي من اللي قلبك يحبها وفوقها

عسل صافي بلدي مع الخبر الحار ماني عارف السر

انهم خلوه آخر شي المهم خلصت

اييك يقول لك عندك 3 اصناف مشروبات طبعا هذا غير العصيرات اللي اثناء الأكل

هني المشروبات الساخنه تبي قهوه بيضا ولا سمرا ولا شاي ولا الثلاثة

مع بعض اهني انت تبتسم وتقوله مشكورين على حسن الضيافة وما قصرتوا

والمبلغ اللي بدفعه حلال زلال عليكم

طبعا السعر هو 30 دولار للفرد

ملاحظة اخيرة انقرصنا منها كذا مره لازم تصوم قبل ما تروح له او على الأقل ما تكون ماكل شي

قبلها ب8 ساعات وعليكم بالف عافية واللي يروح هناك يتنقص لي

وعليكم بالف عافية