استريحي يا وزارة الكهرباء والماء

معلش اسمحولي بهذا الموضوع واللي يزعل بكيفه اللي صاير عندنا بوزارة الكهرباء خلطبيطه وتخبط

ما بعده تخبط في كل النواحي بدءا من المعاملات والإجراءات المتبعه وإنتهاءا بصيانة المحطات الكهربائية

ما انكر عندنا كفاءات وتشتغل بجد وتعب وتراعي ضميرها جدام الله قبل المسؤولين لكن المشكله

مثل اللي يلف حوالين نفسة تقولون لي ليش انا اقول لكم علشان يشتغل الواحد لازم له أدوات

وقطع غيار طبعا كل ما طلب شي يقولون لك رقع حالك ما عندنا ميزانية فيضطر انه

يصلح القطع القديمة ويرد يركبها علشان يمشي الشغل وكما تعرفون القطعه القديمه منهكة

من كثرة الإجهادات الواقعه عليها جراء التحميل الذي وقع عليها اثناء فتره الخدمه

المهم ما ابي اقول كلام هندسي زياده عن اللزوم يركب القطعه ولكنها لاتصمد

فترة كبيره علشان اييبون حضرتهم القطعه الأصلية لكن الحبايب عمك اصمخ

دام القطعه اركبت طاف ما يطلبون قطعه فلما يحصل عطل تعال رقع هني

ويصير- شد داون- للوحده ومنو السبب طبعا اللي صلح القطعه هذا يزاه

انه صلحها لو رافض من الأول كان اشرف له لكن حسه الوطني يمنعه

المهم هني يطلع المسؤول مثل البطل ويصرح أنه السبب اهمال هذا الموظف

ويتم معاقبته على إخلاصة الزايد ويصير المسؤول بنظر الناس هو البطل

الحقيقي هذي شغله .

اما الشيئ الثاني من فتره والشباب في قسم التشغيل طبعا هذا الكلام

قبل فتره اكثر من خمس سنوات كانوا يقولون لي انهم بالصيف

يشتغلون على الفل لود هذا على حسب كلامهم وانهم كلموا المسؤولين

عن هالشي وقالوا لهم عادي كل صيف يصير جذي

على الأقل حطوا خطه فكروا بشئ لكن الكل مهتم بالمنصب وخايف اذا

تكلم يشيلونه

ومره من المرات في قسم الانتيك صارت حادثة غريبة بصراحه

البحر صار كله خضر من الطحالب المهم شفنا البحر اخترعنا

وكما تعلمون قسم الانتيك هو القسم الذي يتم فيه سحب المياه

للتبريد وللغلاية واذا تسكر ممكن المحطه تتسكر بكبرها

او تنفجر في أقصى الحالات المهم شنو كان تصرف المسؤول حينها

قال ما عندي ميزانية ماعندي الا 100 دينار واتصلوا على الشركة على ما اذكر

كان اسمها كهروميكا وجابو طراد 21 وغطاس على قد الفلوس

اشلون يوخرون الطحالب يوقف الغطاس في نقطه مثل مركز الدائرة

ويمسك طرف الطاروف او الشبك والطرف الآخر مربوط بالطراد ويلف الطراد

حول الغطاس مثل دائرة ويتجمع الطحالب في الشبك ويخرجونه للخارج

طبعا كانت طريقه غبيه فعلا واستهبال ما بعده استهبال وما كان هالشيئ

ليحصل او انهم وضعوا شبك حاجز بدل التالف

طبعا تكملت القصة انه الطراد ماكينته اختربت لانه الطحالب كانت بكثرة

وانحشرت بين البروانه ووقف ووقفوا الشغل بعد نصف ساعه

ولا سوو اي شي طبعا لولا رحمه رب العالميه كان رحنا فيها

لكن بعدها دار الهوا واخرج الطحالب من حوض السحب

المهم اللي حبيت اقوله انه في تخبط ما بعده تخبط بالوزارة واحنا شايفين وساكتين

واللي بيدنا نسويه حاولنا تكلمنا اكثر من مره لكن محد يصدق والحين لما وصلنا

للقطع المبرمج الكل قام يصرخ الشغله كانت باينه من زمان والمحطات متهالكة من فترة

وقاعدين يرقعون فيها مثل اللي يسوي انعاش للميت ولكن هيهات

لو انه وزارة الكهرباء فعلا تبي تحل هالمشكله كان سوت خطه للطوارئ اشلون

انا اقوول لكم بدال ما يطرحون مناقصه وتاخذ لفتها والإجراءات الروتينية المزعجه

ما بين الوزارة نفسها الى الفتوى والتشريع ثم الى ديوان المحاسبه ثم إلى لجنه المناقصات ثم للوزاره مره

اخرى وبعدها يتم اختيار الشركات التي ترسى عليهم المناقصة ثم يخلون بالعقود

وتبدأ الوزارة بإخلاء طرفهم لعدم التزامهم بالعقود بدال هاللفه الطويله والحوسه

تقوم الوزارة بتقديم خطه للطواري لمجلس الوزراء بأن يسمح لهم بإستدراج العروض

مباشرة من الخارج من بين الشركات العالمية ويتم المقارنه بين العروض ودراستها خلال شهر

والموافقه عليها من غير شركة وسيطه كما هو حاصل لكن عدوى التنفيع

ما يقدرون يتخلون عنها